近一年黎，香港個社會可以分三個階段：逃犯條例、武漢肺炎、國安法。逃犯條例嘅修訂其實老實講，我睇條文睇唔出有咩問題，實際嘅問題在於共產黨無公信力可言+港府已被認爲係中共嘅傀儡所引起吧。當然武漢肺炎嘅關係，令到啲抗議示威有所收斂，而其實武漢肺炎亦係個好機會讓港府爭取民意支持，但可惜嘅係林鄭做嘢都係保守得濟，去到比較緊張嘅時間先宣佈封關。如果林鄭可以早啲響應民意，儘早封關嘅話，睇怕現在嘅支持度亦不至於咁低吧。
而係武漢肺炎後，五大訴求嘅示威亦逐漸恢復返，但我個人觀點係，而家嘅示威與其話五大訴求，缺一不可，更多似係對港府嘅無能及愚昧抗議及宣泄情緒。其實跟住落去乜都唔做嘅話，大概一年半載，呢類示威咪變例行公事，然而偉大嘅祖國卻要搞個國安法落黎。但，我唔認爲國安法會對香港社會產生實際、即時嘅顯性影響，因爲事實上國安法嘅語義非常曖昧，要套入香港嘅司法實踐中而言缺乏足夠多嘅細節。但佢嘅影響卻可以好深遠且隱性嘅，一般缺乏見識嘅人（例如我老母）都會覺得不是壞事，香港明天會更好吧。
其實首先係中美之間會互相攞香港玩21點咁，希望無限接近於21點但又深怕被爆，中國攞國安法黎期望試探下美國，而美國亦用類似極度空虛嘅口徑回應中國（話會做，咁幾時做？點樣做？一樣無細節。）。
其次，國安法有助令大家「恐懼」犯法。注意，係恐懼，即使有關行爲唔犯法，但僅僅擺條法律係度，大家就會習慣地自我審查，最終無人敢大聲說話，悶聲發大財，亦係中國嘅盤算之一。
而第三，中國共產黨可能認爲香港嘅利益和價值已經走到盡頭，無需再維持虛假嘅一國兩制，而對臺灣嘅示範作用……邊個會覺得有啊？所以，係時候以一個中國利益爲優先，從人大決定事件開始，中國開始爲一國一制作部署。係中國政府嘅眼中，香港人恐懼中國固然係愚昧且可悲的，但更多時候的是，中國政府亦對建制派甚至香港政府不滿很久：有事時求中國政府出手，選舉時候就反轉豬肚就係屎，交代要做嘅政治任務卻一值做不好。叫你堅決落實23條，落實咗幾多年？都做唔好。所以，除了革香港的命外，睇怕建制派嘅極端勢力亦會乘機奪取溫和派既有嘅資源和企位，香港社會嘛，咪更加兩極和分化。
BTW，我覺得無人天真到覺得國安法有助令香港社會安寧，而非走向極端對抗掛？有嘅話我知，我會當面恥笑佢。
頭盔：堅定支持一國一制，落實香港全面回歸；淘寶全國包郵包香港，立即拆除深圳關；香港人，愛國！