[認識國情] 中國嘅「醫療詐騙」
當有身體唔舒服嘅時候，除咗睇醫生之外，相信有唔少人會嘗試Google一下先，睇下有咩治療方法/醫院可以揀。但有無諗過上面啲廣告可以喺詐騙？日前喺中國就發生咗呢件事。
話說喺中國，有個後生仔患咗滑膜肉瘤，就嘗試喺百度（中國嘅幾乎壟斷級數嘅搜尋引擎）上面搵資料。咁喺最上面嘅喺一啲醫院嘅廣告，佢同佢嘅屋企人不疑有詐，就去咗有關醫院嘅網站詢問。有關醫院嘅醫生向佢哋推廣據稱美國史丹福大學同佢哋醫院合作搞嘅免疫療法。咁佢開頭睇資料，間醫院喺三甲醫院（喺中國入面醫院評級最高嘅等級），而見佢嘅主任又成日上CCTV（中國中央電視台囉，識啦掛），又號稱個技術喺史丹福大學嘅，應該無死啦掛。
於是佢哋屋企東借西借，倒咗二十萬人仔落呢個免疫療法上面。但喺好可惜嘅喺，幾個月後佢再去睇醫生，話佢個腫瘤已經轉移到肺部，病情已經從有得醫變到無得醫。後來拎到標靶藥，但喺都只喺吊命而已。
其實中國喺「無效治療」嘅治療手法喺好常見。而呢次事件正好概括出中國成個「低效力醫療詐騙」嘅產業鏈。首先由百度之類嘅公司提供廣告俾彷徨中嘅病人，咁病人基於對醫院嘅良好意願會降低戒心，之後醫院嘅人會向有關人士推介一啲好似喺咩「美國史丹福大學技術」之類聽落好似好先進嘅醫療服務同療程。好似今次事件咁講，醫院向病人推介免疫療法，其實喺美國因爲被發現其實對腫瘤無乜用，所以轉咗去研究其他範疇嘅治療可能好耐。但喺由於聽落好似好先進，所以有唔少中國醫院用嚟「賺錢」。
而據中國某寫手訪問史丹福大學話，其實有關嘅免疫治療早就唔用喺腫瘤上面，因爲發覺效力太低。但相對地，史丹福大學而家喺研究緊用免疫療法去輔助治療骨髓發育不良之類範疇嘅輔助療法。而史丹福大學接受訪問時都話唔明白點解會有醫院話同佢哋有細胞治療方面嘅合作，會研究點樣追究有關事情。有趣嘅喺，該寫手搜尋相關嘅研究文獻發覺，近年積極搞呢啲研究同出論文嘅，好多都喺中國人。
呢類「詐騙」其實本質嘅治療手段好多時唔喺咩無效治療或者喺會直接加重病情嘅錯誤治療，而喺用一啲落後或者無效力嘅藥或其他治療手段去以低成本高利潤方式榨取病人價錢。而中國地方唔少地方嘅人由於醫療知識唔高，有部分人有偏見覺得治療貴就好嘅概念，但對療程本身其實唔多瞭解，所以亦輔助到呢啲「行業」嘅持續發展。此外，有好多問題唔出事又唔會管嘅態度，導致呢啲「治療」被合法地存在。再者，百度搜尋都應當負上唔少嘅責任。事實上，百度爲咗賺錢，喺今年年頭試過出售佢旗下百度貼吧（類似討論區咁）嘅「血友病吧」比著名嘅「醫騙」（醫療騙子）去做「吧主」，並撤換原有人馬。在一番擾攘後百度話撤換咗有關人士，並承諾以後只會同NGO合作，唔會再同商業機構合作搞貼吧。
但喺貼吧之外，百度嘅「詐騙」廣告依然唔少，好似呢次受害者就喺係百度搜尋有關疾病嘅醫療資訊，而有關嘅醫療資訊仲要喺百度嘅贊助廣告，換言之啫喺用錢買特定關鍵字嘅「優先顯示位置」而換返嚟嘅。對於呢次事件，百度固然話有關醫院屬於國家醫院評審入面最高嘅「三甲醫院」，所以唔覺得有問題，亦唔存在虛假資料情況。事實上，唔少中國醫院就喺藉住自己「三甲醫院」嘅身份，大肆賣廣告推銷自己嘅「治療方案」，但對於呢啲「治療」嘅效用，好多時候其實無乜用但依然會誇大其效用，向病人及其家屬話好見效，治療成功率極高云云。有部分無病話你有病提供無意義嘅「治療」就仲好，怕嘅喺有啲人有大病但得唔到適切治療，或者有無病嘅被「醫」到有病嘅個案。
呢個後生仔嘅個案唔喺孤例，每日喺中國唔同地方都有類似嘅事件發生。除咗政府嘅規管（如果有效嘅話）之外，我諗，最緊要喺，做人，真喺要有良知。
參考：
[http://tech.qq.com/a/20160501/012212.htm](http://tech.qq.com/a/20160501/012212.htm)
[https://www.zhihu.com/people/wei-ze-xi-89](https://www.zhihu.com/people/wei-ze-xi-89)
[http://tech.sina.com.cn/i/2016-04-30/doc-ifxrtztc3083341.shtml](http://tech.sina.com.cn/i/2016-04-30/doc-ifxrtztc3083341.shtml)
[https://theinitium.com/article/20160111-dailynews-baidu/](https://theinitium.com/article/20160111-dailynews-baidu/)