秋意遠去，充斥在週遭嘅係冷得刺骨嘅寒風深刻地提醒緊，而家正係深冬嘅一月——用影集、動畫甚至文藝作品嘅話，大概會係「白雪紛飛」之類嘅來形容如今嘅季節吧。
但很可惜，香港係亞熱帶地區，即使係最凍嘅冬天，亦絕少跌破0度，更加唔好奢談乜「白雪紛飛嘅深冬」。世上總有啲事情係命中註定嘅，正如香港嘅氣候決定了唔會落雪般，我嘅大限亦係早於命定咗嘅。
——可能再咁落去各位會覺得強裝文雅——好啦，我亦唔係咩精於咩附庸風雅嘅人。
坐係我隔離檯嘅係我嘅同班同學之一，靜靜地趴係檯上瞓覺。——對於佢，我哋班上大抵都係「呀靜」、「小靜」咁叫佢。而要如何形容佢嘅話，我相信一言足以蔽之：「小動物」。
纖體小巧、只差一點點就150cm左右嘅身高，即使快中學畢業，卻有着中一學生所應有嘅青澀、純真並帶着稚氣嘅面容。
——簡單而言，就係純潔系嘅合法蘿莉。
叮咚叮咚——即使放學鐘聲嘅響起，班主任依然有條理地仔細吩咐着各種事項和派發通告。就咁又搞咗差不多十分鐘後，終於把班會要做嘅事搞得差不多，而班主任打完招呼後亦叮囑我哋一番之後，亦離開科室。而不久後，原本瞓緊嘅小靜亦打着呵欠，慢動作地爬咗起身。
「……放學？」佢醒來後觀察咗週遭嘅狀況後問我。
「嗯，放學嘅時間啦。」我一如以往，帶着微笑地回應。
「哈啊……」佢敏捷地把裝飾用嘅課本啊、補充練習啊、啱啱派發嘅通告一口氣塞入Locker後，背着幾乎無嘢嘅書包，踏上歸途。
「啊……」
——等等我，係我猶疑緊好唔好咁講嘅時候，佢如同一陣風般，早已離開了。
呢個已經係一如以往嘅結局了。
明明鍾意人，努力擠進佢身邊，希望可以同佢一齊，但呢一年黎，我哋嘅關係亦彷彿僅僅隔離檯嘅關係——唔係彷彿，係根本係。
話唔定，佢根本無在意過我，只係視我爲普通嘅「同學」，同呢個班上其他嘅三十多人無實則上嘅分別。
「唉……」諗到呢度，我又不禁灰了起來。
「今日又同公主大人講唔到幾句啊？」來到我面前答話嘅係原本坐緊我呢個位嘅呀傑，帶着些許挖苦嘅腔調咁講。
雖然佢講嘢點都有啲窒人嘅意味係度，但實際上係相當關心其他人，亦係班務上勞心勞力嘅副班長，代替一事無成嘅班長——即係我處理大多嘅事務。
「正如你所見。」我對於佢嘅挖苦，亦只能豁達地回應。
「雖然怕羞係可以理解……不過再咁落去就畢業啊？」
「畢業……啊……」
呢個亦係理所當然嘅事，已經係中六嘅我哋，可以係呢個班房坐埋一齊，頂多仲有半個月時間。
亦即係話，我哋半個月後就要以DSE嘅應考生身份同學校講再見，之後就係考DSE到畢業嘅一直路了。
無論我如何擔憂，如何地害怕，如何地拒絕別離嘅日子到來，時間依然分秒不慢地準時前進。
——限期，就係嗰度。
#
現實世界，非常無聊。
地球上大抵嘅人類，都係過着極爲枯燥嘅生活。
每天返學讀書，讀個好成績又升好嘅大學，讀幾年又出來工作，之後做住一份朝九晚六之類嘅工作，準時返工返學，又準時放工放學。
噉樣嘅生活有咩意義？噉樣嘅人生又有咩意思？
「……哈，異世界真好啊。」
憑着一身外掛，去到異世界想做乜就做乜……真好啊，自由自在真好啊。
放學後嘅我返到屋企，睇咗眼媽媽一如以往嘅「加班，飯菜係雪櫃，自己整」嘅紙條，我便隨意把書包放係一邊，把今日出產嘅某爛大街、被評爲「廁紙」嘅異世界轉生輕小說改編嘅動畫用唔講得嘅手段下載落來，把飯菜熱好後便一邊食住飯，一邊睇住今日更新嘅一堆「廁紙」。
故事？嗯，簡單明瞭，就係講男主角死後穿越到異世界，靠着轉生時神明們送嘅特典，肆意開着外掛，收了各種後宮，開心過日子嘅故事。
設定雖然隨處可見，但故事有不少嘅搞笑位及主角大顯身手嘅劇情，動畫化後嘅處理，顯得比小說原作更加討喜。
就咁，把今日更新嘅幾套動畫同漫畫消化完之後已經係晚上十點幾啦。
啊不過話時話呢個男主角好似邊個……
嗯……究竟係邊個呢……好似邊度見過咁嘅男仔。
「文靜〜」門外傳來媽媽呼喚我開門嘅聲音。
我把睇緊嘅動畫暫停，跑去幫媽媽開門，之後又再跑回房間繼續睇動畫。
——哦係啦，好似隔離檯嘅嗰個……嗯，叫咩名呢……好似叫……呀偉？一副人畜無害嘅樣貌，把前蔭剪短少少，個頭髮去除刺蝟頭嘅部分……嗯，真係有啲似。至於性格……嗯，我都唔知，基本上我係學校都係瞓過去嘅，放學亦直奔屋企，所以只係偶爾唔想瞓嘅時候先會有多兩句。
啊不過，啲咩通告啊、手冊之類開頭基本仲係我寫嘅，後來佢坐我隔離之後漸漸地啲嘢我就委任佢搞……而我係學校就瞓得更加安穩，係呢點上都應該多謝下佢嘅。
所以，其實，佢都算係個好人？
嗯，下次要搵個機會多謝一下佢先……記得嘅話。
嗯，記得嘅話。
……嗯，總之，一邊諗住啲百無聊賴嘅嘢，一邊隨機睇着各種睇落好似有趣嘅影片、文章之類嘅嘢，之後便係迷迷糊糊之間墮入夢鄉來結束一日。
#
「各位同學，要記住DSE雖然好重要，但絕唔係終點，成績好重要但唔係人生嘅全部，最緊要盡力，無悔當初就足夠啦。」
「好多謝校長嘅勉勵，咁今日嘅畢業禮都到呢度結束。跟住各位同學請跟從指示，有秩序咁離開……」
時間已經來到畢業典禮當日，亦係最後一日會着住校服返到學校嘅日子，亦係要把Locker清理好，同學校以至同學們訣別嘅日子。
而我，已經未能對佢講出真正想講嘅個句話。
回到課室後，班主任把之前測驗嘅成績派比我哋，跟住一堆各式各樣嘅文件以及重要嘅DSE考生證之後便原地解散。
因爲係最後一日，很多以前唔准我哋做嘅事情，例如係校內用手機留念啦、係校服上塗鴉啦之類嘅事情，學校只係今天都默許我哋隨便咁做。
所以，很多同學周圍跑，同很多唔同嘅朋友們交換彼此嘅聯絡方法啊，係對方嘅校服簽名留念，作着根本唔太可能會做嘅約定之類。
而小靜就很冷淡地清理緊Locker，把Locker嘅一堆書本同雜物掃曬落書包，準備一次過帶走。
「嗯……」但似乎啲雜物嘅量比想像中多，即使塞包書包，亦有相當數量嘅書本不得不擺返出來。
「啊……靜。」
「嗯？」隨着我嘅呼喚，小靜把頭轉向我來。「啊……呀偉。」
「……」嗰個係邊個？唔係啊，我個名無個偉字啊，所以亦唔係叫呀偉。「……李天旭。」
「哦，李天旭同學……嗯。」小靜扭扭捏捏又欲言又止嘅樣貌，糾結咗大概幾秒之後，便又開口。「嗯……多……多謝你。」
「嗯？」
「你睇，我咪平時喺度瞓覺嘅，啲通告啊、功課啊、手冊之類嘅……」
啊，嗰啲雜務啊。
「嗯……唔使客氣。」
「咁所以，可唔可以幫我一個忙？」
「當然可以。」我未聽佢要我幫咩忙，已經直接同意咗。
不過係呢刻，有咩要幫忙 我早已估到。
——————————。
於是，裝唔入書包嘅部分，我同小靜一人一半拎住，走向佢屋企。
「呀〜〜〜有你幫手真係幫好大忙，如果唔係我諗只可以來回兩次了。」小靜心情愉快咁同我講。
「哈哈……來回兩次即係……」但來回兩次即係，小靜住附近？
「嗯。我住嘅大概就係穿過前面個輕鐵站落去大概兩個街口到。」小靜似乎睇穿咗我心思搶先回應。
「原來你住得咁近架……」步行最多20分鐘嘅路程，難怪成日未瞓醒咁，都未見佢遲到——話時話個附近好似有豪宅……
「嗯。」佢肯定道。
「啊嗯，係啦，你畢業有咩打算嘛？」
「嗯？無特別諗過……可能都係求其搵份工過日晨掛……啊啊，如果唔使工作都有錢就好啦。」
「哈哈……點講都好都有啲難掛。」
「嗯，都係。咁你呢？有咩打算？」
「都冇乜打唔打算……」我係心中平復心情，控制住緊張嘅情緒，想象着想象嘅將來。
「如果可以嘅話，我想可以同鍾意嘅人一齊，可能一齊讀大學，共渡四年愉快嘅時光……」
「之後呢？」
「之後……」我諗咗諗，「之後可能會搵份安定嘅工作，組織個幸福嘅家庭？」
「……哈？咁無聊？」
「無聊咩？唔通齊齊異世界轉生咩？」雖然呢期好似好流行呢類嘅題材。
「嗯……異世界轉生唔錯啊……不過現實邊有咁嘅嘢呢……但至少，你都應該遠大啲，環遊世界之類吧。」
「但要環遊世界都要錢吧？咁都係要努力工作吧？」
「係就係不過你唔覺得咁好似有趣啲咩？再講，你有鍾意嘅人咩？」
「Errrrrr………………」對於呢個問題，真係好難答。
我努力控制住呼吸，調節心情，話俾自己聽，而家就係個好機會。黎啦，Be a man，鼓起勇氣講出來啦！
「嗯………………？真係有？邊個？」佢係我猶疑緊嘅時候乘勝追擊，毫不留情咁逼問。
「嗯？」
「啊？」
「嗯嗯？？」
「咪住。」
「莫非。」
我沉默而對嘅半分鐘後，靈敏嘅小靜已經似乎領悟到答案。
「我？」
嗯。
微微地點頭。
「理由？」
我哋已經停止前進，係輕鐵站嘅不遠處企係原地對峙着——從旁觀者而言，呢個狀況比較似佢拷問緊我。
「呀……點講好呢……」
我唔認爲普通嘅告白可以得到佢嘅垂青，而過於突出嘅表白亦過於冒險……點好呢點好呢，雖然表白呢個行爲我腦內演示試過無數次，亦試過無數場景，但有着巨大壓力嘅逼問嘅情況下都係第一次。
「嗯？」
黎啦，呢個關乎你人生嘅幸福，諗下有咩辦法可以一發入魂，令對方對自己產生興趣——
啊。
咪住，我記得曾經有套佢帶過黎學校，應該睇過幾次嘅異世界轉生類輕小說係呢季動畫化咗嘅新番黎嘅……。
個套似乎亦係少數佢會翻睇過幾次嘅所以應該係fans，之後今期動畫化而且評價唔差所以佢會追睇……
然之後，作品中，名叫太郎嘅男主角初次對白髮蘿莉嘅女主角告白嘅時候亦係處於類似嘅情景……我記得佢嘅回答係——
#
不得已，拜託隔離檯嘅同學幫手拎部分嘅Locker雜物返屋企。路上爲免太無聊，便隨意地同佢閒聊。
但到了鍾意嘅人嘅問題上，佢就停係原地，猶疑不決咁望住我。
嗯？真係咁難答咩？哦都可能係單相思，年輕嘅青澀真係好——啊，雖然我都係同齡。
嗯咪住，呢個劇情好似好熟悉，莫非，唔通。
誒，我？
但我哋應該無乜兩句吧？冷靜啲小小靜小姐，認真諗下，大部分嘅班級都係半個學期會調一次位，基本上唔太可能連續一年都係鄰居。
而且對方仲可以毫無怨言咁幫異性嘅隔離檯同學處理大小事務，保障佢嘅睡眠時間。
明明傾無兩句話，依然可以咁好人地幫我擡雜物。
現實唔係輕小說世界啊，邊有咁好又完全沒有所求嘅人。
所以呢個氣氛，呢個話題嘅「前方」恐怕係……
呃……所以，莫非，個對象係。
「我？」
OK，佢微微地點頭。
……誒，等等，我？唔係我自誇，我除咗成績好少少之外，基本上無任何優點啊？
等等等等，無論如何我都係個清純少女係咪？根據我多年上網學到嘅知識，呢個世界上有類處男係只要少女都啱嘅，心中亦只有同女仔ooxx嘅慾望，對於呢類人基本上係女仔都ok嘅……所以亦不能排除對方係啲咁嘅人。
所以，呢度應該更加謹慎地。
「理由？」
「呀……點講好呢……」
「嗯？」
佢又陷入猶疑當中，似乎又再努力砌辭狡辯。
好啦，究竟係「因爲你好靚女」之類嘅簡單風，定係「你令我朝思暮想，久久不得睡」之類嘅文藝風，定係「你就是我太陽月亮」之類嘅浪漫風呢？
但下一句嘅回應，卻遠遠超出我想象之外，令到我反成爲咗呆咗個一方。
「因爲我係蘿莉控。」
「噗……」噴咗出黎。
——嗯，我努力理解緊佢想表達嘅嘢。
「你鍾意我？」
「嗯？」
「因爲你係蘿莉控？」
「嗯……」
「所以你鍾意蘿莉嘅我？」
「啊係……？」
「即係唔係蘿莉之後就會無情咁拋棄我？」
「啊唔係，我嘅意思係……」
「嘅意思係？」
究竟做緊乜嘢，呢個滑稽嘅情景。噉樣係旁人眼中，會唔會有啲似情侶間嘅修羅場呢？係我咁角度，好似，真係好似啲高登仔成日講啲女朋友迫害男友嘅故事咁。
突然之間，覺得自己好蠢，覺得以前嘅自己好黐線。
明明咁有趣嘅事係身邊卻充耳不聞。
明明有趣嘅人一直係自己身邊卻視而不見。
忽然發現，無聊嘅唔係現實。
啊啊。忽然之間以前覺得係咁嘅事情已經唔係咁。
究竟我諗緊啲咩呢。
「哈哈哈哈……………………」不禁大笑。
「小……靜？」面對我忽然大笑，對方亦想必陷入混亂當中吧。
嗯？話時話。
「誒，太郎。」
「我叫李天旭。」
「嗯，咁蘿莉控噗啊哈哈。」
「係，我係太郎。」
啊，原來世界都可以咁有趣架。
嗯，原來少女漫畫嘅內容都唔係咁虛構。
所以，就試下吧。
就踩入去吧。
名爲「戀愛」嘅「不合理地獄」。
從中搵到更多快樂吧。
「嗯，所以太郎君。」
我提高聲線，用平日更高少少嘅聲線，動畫常見嘅蘿莉音講下一句話。
「可以踎低少少，咪埋眼吧？」
「嗯。」同學李……訂正，男主角太郎順從地踎低並緊閉雙眼，之後便如同小說般……不而家動畫化咗所以都可以話係如同動畫中嘅情節嘅再現。
女主角嘅我，用行動作出回應。
「嗯……」
「嗯〜〜〜」
嘴脣重疊一齊，同小說啊、各類文章之類嘅描述不同，接觸本身並無太多複雜嘅感覺，亦冇咩直接帶來嘅興奮。
嗯。但，卻有種如同AA膠般嘅魔力，使得彼此久久都不如睜開眼分開。
「呢個係我嘅回應，滿意嘛。」
「啊係，非常滿意！」太郎非常興奮地回應。
「嗯，好好。」我忽然諗起本書係後宮小說，又補多句，「不過，後宮禁止。」
「啫係唔係後……」
「嗯〜〜〜〜〜？」我以狐疑嘅目光望住太郎。
「嗯，Roger That。」佢轉念有少少失落嘅眼神望住我。
聽講後宮好似係咩男人嘅夢想？我好似係少年漫畫定連登睇過類似嘅內容。不過，即使如此，我亦應舉起現代法律作盾牌，捍衛我應有嘅正當權利——好似係咁？
「嗯？仲有咩要求？」我見猶疑不決諗緊有嘢講唔講嘅佢忍唔住問咗先。
「唔係，我諗緊，係咪應該快啲送好呢批貨物。」
佢指咗指放喺地上，屬於我嘅雜物，又掃視周圍因爲我哋之間嘅騷動而圍觀食花生嘅羣衆，問道。
「好。作爲報酬，黎我請你飲Bikkle啦。」
「哈？但係我鍾意可爾必思多啲……」
「益力多都有架〜」
「Bikkle得啦！」
於是，我哋兩人又再踏上歸家嘅路途。
至於之後太郎DSE 肥咗，根本冇得好似佢夢想咁同我升同一個大學而被迫去讀IVE並被我笑咗3年以上，又係另一個故事啦。