前言
Falcom年度大作《閃4》上個月未時發售，作爲軌跡系列fans當然買買買啊.png。《閃4》嘅前作《閃3》雖然惹來很多批評，劇情發水、結局斷得突然之類，但同《閃2》一比，又好似好幾多，至少劇情穩健、有充足空間描寫人物性格、行爲等。而《閃4》，經歷《閃2》及《閃3》後，似乎又好咗唔少，大概。
遊戲時長
難度係Easy，終章先轉Very Easy，相信對此影響不大。轉嘅原因？終章嘅戰鬥真係難咗唔少，真係配得上「終章」之名。……好！遊戲長度應該大約60小時+，其實還好。
OP
今次《閃4》嘅OP秉承《閃3》，將OP製作似乎外包咗，所以亦同樣慘烈。各種frame對唔上詞，極其古怪嘅節奏……嘛，樂觀啲睇，OP慳皮而使係豐富遊戲內容，比起某法國廣告大廠的，總係件好事。
戰鬥
while(team.contains(sara) && bp >= 5)
今次嘅戰鬥系統基本架構同《閃3》一樣：物理屬性、BP、Arcus、體勢崩塌。通過對應嘅物理屬性（射、剛、斬、突）、能造成對應弱點傷害嘅時候可以選擇追擊（BP+1）、Rush（BP-2）以及地圖炮（BP-5）。而BP除此以外，仲可以根據隨隊人員有唔同嘅「Order」嘅全隊Buff可以用。從簡單嘅加攻防回HP.EP.CP到絕對反射甚至零驅動都有。而且對手除咗HP之外仲有崩塌值，一旦崩塌值到0，就直到下次輪到佢爲止，打佢必定可以追擊（BP+1）。雖然令遊戲節奏快咗、緊湊咗，但亦因此係係上代《閃3》有個好精美嘅數學題，上代サラ有Order係消耗4BP全隊加速……然後剛好全隊有4個人……就，永動機啊。而今代將サラ招加速消耗bp加一，要再永動機亦幾乎不可能。除此以外エマ無限魔法流嘅一籃子玩法喺今代亦有所削弱，亦令到遊戲戰鬥相對而言平衡咗。而且今代啲怪即使係野怪都多咗好多各種異常狀態，係開拓新地區同時亦要留意啲怪嘅異常，如果唔係好易因為一時失手而引起連鎖團滅。
騎神戰
猜拳遊戲你想有咩好講？
劇情
ユウナ！
上代嘅作品斷咗係リィン因練成咗ミリアム做外之理劍而發狂，跟住食埋咀咒屠龍後被捉住，然之後突然斷片結束。而今代一開頭當然リィン冇咁快回歸，排除序章、斷章及終章呢啲短篇，係共三章嘅長章當中嘅第一章冇リィン、而似乎係由ユウナ帶隊，講佢哋去尋找小夥伴，組隊準備拯救リィン嘅故事。而第一章嘅頭當然不能免俗，每次危急嘅時侯又係前輩插入，不過比起上代嘅套路到讓人煩厭，今代嘅劇情處理上處理自然得多。
否極泰來
上三代嘅リィン幾乎係被虐嘅，《閃1》到《閃2》自然被安排得很好，而到咗《閃3》爲咗對抗安排，リィン試圖反抗，然之後到結局之前都以爲仲救到……點知最後發現，原來全部都係宰相嘅計劃之內。原本想拯救世界準備去屠龍，結果發現屠龍正正係宰相嘅希望，將「帝國嘅咀咒」山坡開去。而到咗《閃4》，作爲《閃軌》最後一作，當然唔可能再虐落去唔準翻臺，所以今代主角羣嘅待遇顯得好得多。甚至乎爲咗賣情懷，搵啲老人嚟救場。不過咁，至少，真係無《閃3》頭嗰種尷尬嘅味道已經好好……
萬惡之源：黑之騎神
點解帝國過千幾年前嘅帝國人要打交搞到焰與地至寶融合成鋼之至寶，點解900年前好地地和解咗嘅魔女與地精會再起爭端，點解無啦啦會搞單ハーメル事件出嚟，點解會有黑暗龍事件，點解帝國仲係咁多災多厄。（停手啊！）（唔好再講啦！），Hya，真相只有一個，就係所有嘅元兇，都係帝國嘅咀咒以及其具現，黑之騎神嘅所爲啊哈哈哈！
結社嘅計劃 與 宰相嘅計劃
而圍繞故事嘅主軸當然係原本係結社嘅，後俾宰相騎劫嘅《幻焰計劃》。而由開頭，你可以見到結社人員嘅散漫：每次同主角打打到差唔多就會講幾句幹話就走。到後期，逐漸揭露「幻焰計劃」同宰相嘅計劃完全相異。
作爲被黑騎附身嘅宰相只係作爲純粹嘅惡意想透過「巨イナル黄昏」讓世界沾上咀咒（只要成爲帝國屬地就會傳承到咀咒），然後齊齊大爆炸。而結社目的亦在《閃4》判明，透過包括「巨イナル黄昏」嘅手段將「至寶」從異空間降臨到現世，然之後摧毀也好，回收也罷，總之人類不能再利用就得。
對黑騎而言，「巨イナル黄昏」之後係世界毀滅，而對結社而言，「巨イナル黄昏」成功煉成「鋼之至寶」嗰一刻幾乎已告完成，之後總之有人可以摧毀到「鋼之至寶」，就點都冇問題。而呢一點可以係ベル同小丑對決嘅情節中得到證實：主角同兩人組打，打贏之後小丑驚歎主角羣嘅強大，就透露咗啲情報，之後就連同一直隱形緊嘅神機Alpha傳送走咗。而恐怕主角羣打唔贏嘅話，結社好大可能用神機嚟摧毀「鋼之至寶」。而呢丁點差異亦導致今次《閃4》嘅結社，係反派之外，有多少友軍嘅味道，甚至乎有種結社先係度拯救世界嘅感覺……
可能世界
而係小丑同ベル以及主角嘅對話中，小丑提及其中一個目的係「７つの至宝がこの可能世界において、人の手で如何なる結末を迎えるのか、それを導き、見届けること自体に、盟主の計画の意味はあるのさ」。盟主嘅目的其實前幾作多少估到，但呢度小丑對呢個世界嘅稱呼係「呢個可能世界」就顯得有趣。
結合ED後星辰之間嘅對話，盟主對自己定義係「影」，係「宣告世界的期限」嘅存在，而小丑形容該世界係「可能世界」，加上火焰魔人「マグバーン」揭示佢係來自「外世界」嘅「異界之王」，再加上《軌跡》前作亦描寫過係大陸邊緣有某種奇怪嘅力量使任何飛船或船隻會係邊界打轉，由此可以推測《軌跡》系列嘅世界，可能係某種模擬世界，而外部或世界內部發生咗某啲問題，會導致「軌跡世界」會被終止，而盟主可能係想阻止世界被終止，回收至寶至於，亦透過至寶引起嘅事件鍛鍊人類讓佢哋自救？又或者可能係《軌跡》本系列本身係嗰「遊戲世界」，而家要結束營運，而盟主反對，想實證下該「遊戲」仲有相應嘅價值值得存留？
不過透過呢啲新嘅設定，可以使軌跡世界觀得而更爲延展，可能次作開始可以講解嘅嘢會更多……但以F社嘅規模亦擔心會唔會龐大嘅世界觀會導致處理唔好變成糞作呢……嗯…… ：（
盟主嘅真身
而今作只聞其聲嘅盟主亦係ED後嘅劇情展露咗臉部而外，因此亦有好多猜測起來盟主嘅真身。首先係舊梗，女神論——推測盟主係女神本身，賜予人類至寶但見搞到一獲粥，唯有嚟回收善後。而作爲直接嘅佐證，盟主似乎有類似零之至寶キーア嘅因果視嘅能力，而且高出好多嗰lv，即使計劃多返修正，亦似乎係其預計之內。
再者，如果有打聖獸殘渣先突入要塞就會順利入Happy End。但如果無打，係リィン帶住咀咒離開星球直奔外太空嘅Normal End之後，就會疑似回檔，要玩家打條聖獸，拎到聖獸嘅加護，之後劇情就會變咗リィン同所有人一切集氣，以「一閃」斬開咗「咀咒」。而呢度亦係值得稱讚嘅點題部分，非常適合作爲《閃の軌跡》嘅收尾，前後呼應。而キーア已經失去「零之至寶」嘅讀檔能力，係已登場嘅人物，恐怕係盟主嘅所爲。因爲直奔外太空並沒有解決到鋼之至寶嘅「咀咒」，只係延後到唔知幾多年之後再相遇而已。而且盟主嘅目的係讓人類不能利用至寶，雖然難及但至寶依然係「該次元」內，所以恐怕係佢「稍爲」修正因果，讓リィン得以斬開「咀咒」，使鋼之至寶「幾乎」完全消滅，而Happy End，恐怕係附送嘅。
總結
《閃4》劇情上非常好填咗帝國篇嘅坑，亦爲次作作出相應嘅鋪墊，並將世界觀再拓展，有其更寬闊嘅發展空間，亦使接近科技魔法嘅世界觀，轉型爲疑似後末日嘅世界觀。但以F社嘅規模，我多少擔心能否把握好分寸去處理呢個龐大嘅世界觀就係……
但以《閃4》而言，劇情處理得十分流暢，亦合時讓前作角色有一定嘅出場嘅空間之餘，亦不至於強行將前作角色作爲可操作人物而引起混亂，但亦係終章中段設置咗嗰小迷宮，讓玩家體驗下前作角色以及部分大佬級嘅本作NPC，唔影響整體之餘，亦物盡其用，讓玩家體驗一番亦係樂事。而戰鬥系統方面亦修正咗唔少《閃3》存在嘅問題，戰鬥整體變得更明快、更緊湊以及更刺激，異常狀態、體勢崩塌、BP、Order若不適時運用，即使是Easy模式亦很容易翻船。而反過來說，Normal以下好多時依靠Order級體勢崩塌就已經能取得極大優勢，對某啲熟悉系統嘅玩家而言，體勢崩塌之後幾乎可以靠平A解決，雖然算係比《閃3》有所進步，但依然有很大嘅進步空間。而在劇情上，亦無《閃3》嗰種極其誇張嘅連續兩小時超連續劇過場劇情，《閃4》係劇情之間有所喘息，讓玩家有自由行動嘅空間，係值得嘉獎嘅改進。
總括而言，經歷《閃3》之後，《閃4》修正咗前作嘅問題，亦有良好嘅劇本處理，如果你係系列fans，想必能對此亦有頗好嘅評價，尤其係劇情方面。亦希望F社可以保持水準之餘，再創造出更佳嘅次作。